【up熱話】2021 EV爭霸戰|今年會有咩電動車到港呢?
2021/03/12 13:00

政府早前宣佈大幅增加汽車首次登記稅30%,同一時間提高電動車「一換一」計劃寬減上限至$287,500,仲話計劃2035年禁止電動車以外嘅燃油私家車做首次登記,搞到唔少人都心郁郁,諗住索性劏咗架舊車改揸電動車。


由於突然多咗準買家查詢電動車,《駕輛》探子回報,各代理即時「爆TEC兼着Turbo」,希望增加市場佔有率。


要喺電動車市場分一杯羮,代理各出奇謀,就以寶馬為例,佢哋快人一步,早喺去年11月已經推出「車花盤」,準買家只係畀意向金就預留今年都未知交唔交到車嘅i4。


「車花盤」當然唔係由寶馬開創,不過既然呢條橋Work,所以平治亦都喺3月頭喺香港賣EQA250「車花」,據聞短短幾日已經收到幾百張預留訂單,而呢部新車就預計今年年底交車。


至於德國另一巨頭嘅奧迪,今年重頭戲自然係2月全球發佈嘅e-tron GT。探子回報話代理爭取緊今年內喺香港開售,可以今年開始交車仲好添啦!而新鮮滾熱辣嘅Q4 e-tron,就應該係明年嘅事。而VW嘅ID.3及ID.4,右軚版已經喺英國開售,但係未收到風香港幾時有。


講到電動車,梗係要講Tesla啦!預計今年就會喺香港開售上海製嘅Model Y,但係廠方話唔會賣「車花」,稍後公佈售價先至即時開售,而且未知今年交唔交到車。仲有部Cybertruck,同全世界一樣,訂已收,車就唔知幾時有。


專門製造電動超跑嘅克羅地亞嘅Rimac,香港已經有代理喇!不過代理第一個陳列室喺上海,而且唔知佢哋最新,有成1,914匹、極速達412km/h嘅C-Two會唔會有右軚版到港。富豪汽車姊妹廠Polestar,今年會進軍香港,據知打頭陣嘅係Polestar 2,消息有待官方確實。至於未正式開業嘅快意汽車新代理,據知佢哋都好想引入電動嘅500 Electric,大家會唔會今年內買到呢款小型電動車就要等等官方公佈。


至於日本嘅電動車,日產早前發佈嘅Ariya應該趕唔切今年到港。而本田去年推出嘅Honda e,探子回報話歐洲賣3萬幾歐元其實係廠方特別俾當地嘅優惠價,開畀香港代理嘅就係正價,代理計一計連稅要賣50萬以上,根本冇市場競爭力,簡直係「蜑家雞見水」,所以索性唔諗住引入。凌志第一架電動車UX300e,去年已經喺日本限量發售,今年年初又喺印尼推出,相信亞太區其他地方稍後都會有得賣,但未收到風香港會唔會今年就有。至於豐田,佢哋唯一架C+pod電動微型車,暫時喺日本只係賣俾企業做公司車、Share Car或租車等用途,香港唔使諗喇!


韓國方面,現代汽車將會今年內喺香港開售Facelift版Kona EV,以及尺碼介乎Kona及Santa Fe之間,又有「大電」「細電」,又有得揀後驅及四驅,外形超前衛嘅全新IONIQ 5。


大家久違嘅MG,香港最近居然有新代理呀!依家已經係上海汽車集團旗下嘅MG(名爵),到港第一款車係SUV車型兼且係純電動嘅EZS。據探子回報,代理已經準備咗呢部MG EZS嘅Demo車,而且佢睇過車,發現質素比過往來港嘅國產車高,造工唔馬虎之餘,用料亦唔差,有啲意外,只不過未有機會試揸,未知行車表現係點。探子仲話,代理引入咗兩個版本,豪版32萬有找,普通版唔使28萬,如果係「一換一」舊換新嘅話,平版廿三幾就有交易,肯定係平通港九新界「抵食夾大件」嘅電動SUV。探子講到咁,搞到我哋心郁郁都想試吓部MG EZS,代理見字請Comment、Like and Share,跟手訂閱埋我哋嘅YouTube兼撳埋個鐘,然後聯絡我哋。


#駕輛 #upcarhkg

#up熱話

#今年香港電動車市場競爭白熱化

________________________

Web: http://www.upcarhkg.com

YouTube: http://www.youtube.com/駕輛upcarhkg

Facebook: https://www.facebook.com/upcarhkg

IG: upcarhkg