up一個掣

2020/08/21 09:00

大家記得上次因為甚麼原因打開頭冚嗎？距離現在幾耐呢？頭冚確實毋須經常打開，要打開通常都係為咗檢查偈油、自動波箱油、水箱水、擋風玻璃清洗液等存量，一個月都未必打開一次，而且這十多年來，愈來愈多新車不設油尺，想檢查波箱油一定要返代理或到車房，而要檢查偈油存量嘅話，只需在車內左撳撳右撳撳幾個掣就搞掂，令到車主更加無乜需要打開頭冚。

由於毋須經常打開頭冚，久而久之，有啲人就連怎樣打開頭冚也可能忘記了。筆者唔係講笑！有一位懶於自己打理座駕嘅朋友，持住荷包鬆動，事無大小都會搵相熟嘅車房代勞，車內亦經常放咗三兩疊洗車套票。上月與他通電話，佢話這半年大部分時間都係WFH，有一日因太清閒，於是忽發奇想走出屋外（他住村屋）自己親手洗車，佢仲話對上一次親手洗車已是多年前在外國讀書嘅時候。洗完車之後，佢忽發另一個奇想欲打開頭冚檢查一下。筆者在電話中問佢想檢查甚麼，佢話其實唔知道，只係突然好想打開頭睇睇而已，可惜佢話買車之後只自行打開過頭冚一次半次（筆者嘅想法係其實從未試過），所以唔記得怎樣打開，搞兩搞就放棄，反正根本無特別需要打開。

其實，打開頭冚嘅方法真係幾五花八門，所以每次換新車都應學一學。譬如擺放頭冚掣嘅位置，已經可以係司機位或乘客位嘅前面，可以係靠近腳部位置又或錶板底部，而保時捷嘅就位於司機座旁邊嘅門檻上，法拉利及林寶堅尼MR跑車嘅尾冚（引擎艙蓋」掣係放在車門後方嘅門柱上。拉動頭冚掣後，大部份車輛仲要鬆開頭冚扣先可以打開，而這個解扣掣通常係位於頭冚前端中間下方，但亦有少數放在靠近頭燈的左邊或右邊，而且可以係撥動或向上抽起解扣。

話時話，大家有無留意到電視及電影中，每逢劇中角色遇到車輛死火，近乎一定都會落車打開頭冚呢？莫非個個都識得整車，打算即場修理？抑或壞車後打開頭冚會覺得心安理德得，死得心服口服呢？可能有人話，車頭冒煙，當然要打開睇睇啦！其實車頭冒煙更加唔應該打開，因為有幾多人在車上備有滅火筒，並且邊攞住滅火筒邊打開頭冚準備救火，所以萬一真係著咗火，打開頭冚就有機會被燒傷，就算只係過熱水滾，都有機會被蒸氣灼傷，車頭冒煙最適當處理方法就係盡快離開車輛到安全地方。講到尾，電視電影有好多情節唔寫實，大家唔好有樣學樣有理無理遇到死火就打開頭冚，咁做除咗有機會淪為路人笑柄，隨時更會危害自己嘅安全啊！

#駕輛　#upcarhkg

# up一個掣

#死火打開頭冚只係劇情需要

#事實通常係於事無補

#頭冚掣擺放位置並唔統一

#少打開都應該知位置識打開

___________________________

Facebook: www.facebook.com/upcarhkg

YouTube: www.youtube.com/駕輛upcarhkg

IG: upcarhkg