up一個掣

2020/09/04 17:48

近來頻頻落大聚雨，如果車廂開大冷氣、溫差大加上好潮濕，隨時就會搞到擋風玻璃出現一層霞氣。

好多人都知道冷氣系統面板上有個擋風玻璃除霞掣，撳咗之後理應可以為擋風玻璃除霞氣，不過亦有很多人覺得效果唔太好。按我哋嘅經驗，真係有啲車好掂，有啲車就唔太得，但係唔太得嘅其實只要識用，亦都可以有方法令效果好啲。

近年有唔少新車設有電熱擋風玻璃除霞裝置，原理就同尾窗除霞一樣，而且效果好好。若發現擋風玻璃有霞氣，唔使多講，只要按冷氣控制面板上嘅除霞掣，好快就搞掂。

如果係以冷氣系統吹風除霞嘅車輛，而霞氣在外面，最簡單嘅處理方法就係手動開一開水撥撥走。當然，遇上這情況嘅話，撳除霞掣都得，只不過霞氣在擋風玻璃外面通常係因車廂及擋風玻璃溫度低，車外就又熱又潮濕，所以要用冷氣吹風去除霞氣嘅話，就要令整塊玻璃接近車外溫度，即係調高冷氣溫度甚至開盡暖氣，結果開到最高風速都要等唔少時間，跟住車內溫度亦隨之升高，大熱天時點會舒適。

若果霞氣在擋風玻璃內則，處理方法又唔同。如果車輛用上自動恆溫冷氣，按下擋風玻璃除霞掣之後，通常就會自動調至最低溫及最大風速吹向擋風玻璃，非自動恆溫冷氣就可能要撳掣後手動調至最低溫度及最高風速，三幾分鐘之後理應可以去除霞氣，然後再次調校冷氣溫度及風速至個人喜好。

至於坊間有傳打開少少車窗或天窗可以去除擋風玻璃嘅方法，我哋試過，唔覺得有效囉！最實際都係以上提到嘅方法，或者好似老一輩咁，在門邊準備定一條毛巾，隨時攞出來抹玻璃上嘅霞氣。

#駕輛　#upcarhkg

#up一個掣

#擋風玻璃除霞掣

#新款電熱除霞好好用

#有時用水撥仲實際

___________________________

Facebook: www.facebook.com/upcarhkg

YouTube: www.youtube.com/駕輛upcarhkg

IG: upcarhkg