- 2021/09/17 12:00
【up熱話】電車充電位爭崩頭？！全港邊一區爭用電動車充電位最厲害？
近年愈嚟愈多人考慮買電動車嚟揸，不過除咗售價、車輛大細、款式及續航距離等之外，相信準買家考慮買唔買電動車嘅時候，最擔心嘅係屋企或工作地方附近有邊處可以幫架電動車叉電，所以我哋《駕輛》做咗個調查及數據分析，話俾大家知全港18區之中，邊區有最多及最少電動車充電位，以及現時歐洲制式、日本制式及Tesla專用充電位嘅分佈情況。
平均幾多架電動車共用一個充電位呢？
根據環保署公佈嘅資料（6月30日更新版本），現時香港總共有接近4,400個充電車位，分佈喺425個地點。以現時已登記嘅電動私家車大概有2萬架嚟計，即係接每5架電動私家車共用一個公共充電車位。如果只係計政府停車場內嘅1,119個充電位，平均計算更加係每17架電動車爭一個充電位呀！
最多及最少充電位係邊一區？
再根據環保署公佈嘅資料，現時全港18區之中，最少公共電動車充電位嘅地區係大埔區，只係得54個（分佈喺9個地點）。而最多公共充電位嘅地區就係觀塘區，有891個（分佈喺50個地點）。
標準/慢速充電位佔三成
雖然上文講到全港有成接近4,400個公共電動車充電位，但其實當中有1,460個係標準制式。呢一類只係得個13A三腳插座俾大家接駁隨車叉電機嘅慢速充電位，用佢嚟叉電嘅話，叉足一晚都未必可以叉滿架電動車，所以最多人用及最搶手嘅，其實係中速及快速充電位，呢兩類充電位嘅數目，全港只係約有2,900個，即係大概每7架電動私家車共用一個中速或快速充電位。
日本制式充電位嘅分佈
現時香港嘅電動車充電位，主要分為日本制式、歐洲制式及Tesla專用三大類。雖然日本制式（CHAdeMO）屬於快速充電設施，而且全港18區每區都有呢類型嘅充電位，但總共只係得44個，分佈喺全港36個地點，準備買採用日本制式嘅電動車嘅話就要留意呢一點。
歐洲制式充電位嘅分佈
至於歐洲制式嘅充電位，數量係三大類別之中最多嘅。當中功率低於20kW嘅中速充電位，全港有1,899個，功率高於20kW嘅快速充電位就有361個，唔難搵到。
至於全港最少歐洲制式充電位嘅地區，港島南區及大埔區並列榜尾，各有19個（南區10個中速、9個快速；大埔區15個中速、4個快速）。而最多歐洲制式充電位嘅地區係觀塘，有254個（232個中速、22個快速），純粹計歐洲制式快速充電位嘅話，最多嘅地區係深水埗，有67個（中速有117個）。
Tesla專用充電位嘅分佈
最後講埋Tesla嘅專用充電位，全港有590個，當中有294個係屬於中速嘅Wall Connector，被環保署界定為快速嘅Wall Connector及Supercharger，各有148個。全港最少Tesla專用充電位嘅地區係新界北區，只有4個Supercharger，而最多嘅地區係油尖旺區，有109個（81個中速、20個快速Wall Connector及8個Supercharger）。純粹計算Supercharger嘅話，最多嘅係觀塘區，有20個。
自置家用掛牆式電動車充電裝置
自置家用掛牆式電動車充電裝置當然係解決搵充電位嘅好方法，假如大家居住獨立屋，車位亦喺門外嘅私人物業範圍內，安裝家用掛牆電動車充電裝置就問題不大。但若果大家嘅車位係喺屋苑嘅停車場內，就算係自置車位，由於安裝家用掛牆式充電座涉及從電錶房接駁電線至車位，電線必須經過公用地方，咁就要向業主立案法團，甚至身為公用地方大業主嘅地產發展商申請，大家想安裝都未必能夠獲批安裝。
總結
依家距離全球多個國禁售引擎驅動嘅新車只有十零廿年，電動車嘅選擇當然愈嚟愈多，但其實混能車嘅選擇亦都係愈嚟愈多，原因之一係車廠亦都知道世界各地嘅充電設施未能追上需求，喺禁售期之前嘅呢段時間，各國仍有很多車主怕唔夠充電位而唔考慮電動車，除左傳統電油車，佢哋有機會投入混能車嘅懷抱。混能車於純電模式時既有電動車嘅駕駛感及好處，又唔使擔心搵唔到充電位，兼且耗油量隨時比傳統汽車低近一半。假如大家都係因為充電設施僧多粥少嘅問題而放棄買電動車，又想慳啲油錢嘅話，其實揸混能車都係一個唔錯嘅選擇。
________________________
〖資料摘要〗
全港公共電動車充電位概覽
➤設有充電位嘅地點：425個
➤充電車位數目：接近4,400個
➤全港電動私家車數目：約2萬架
➤平均約每5架電動私家車共用一個充電車位
➤政府停車場內充電車位數目：1,119個（平均約每17架共用一個充電位）
最多充電位嘅一區
➤觀塘區（891個，分佈喺50個地點）
最少充電位嘅一區
➤大埔區（54個，分佈喺9個地點）
標準/慢速充電位
➤全港約1,460個（約33%）
➤缺點：13A三腳插座，充電時間極慢，充電十數小時都未必叉滿
中速及快速充電位
➤全港約2,900個（約67%）
➤最多電動車車主使用
➤大概每7架電動私家車共用一個
日本制式（CHAdeMO）充電位分佈
➤日本電動車常用制式
➤屬快速充電類別
➤全港44個（18區每區都有，分佈喺36個地點）
歐洲制式（IEC）充電位分佈
➤分為中速及快速充電兩個類別
➤功率低於20kW嘅中速充電位：1,899個
➤功率高於20kW嘅快速充電位：361個
➤最多歐洲制式充電位嘅地區：觀塘（254個；232個中速、22個快速）
➤最少歐洲制式充電位嘅地區：港島南區及大埔區（各有19個；南區10個中速、9個快速；大埔區15個中速、4個快速）
➤最多歐洲制式快速充電位：深水埗（67個，另有中速充電位117個）
Tesla專用充電位分佈
➤全港590個
➤中速Wall Connector：294個
➤被環保署界定為快速嘅Wall Connector及Supercharger：各有148個
➤最多Tesla專用充電位嘅地區：油尖旺區（109個；81個中速、20個快速Wall Connector及8個Supercharger）
➤最少Tesla專用充電位嘅地區：北區（4個Supercharger）
➤最多Supercharger嘅地區：觀塘區（20個）
*充電設施數目來自環保署30/6/2021更新資料
下載全港電動車充電站位置（環保署網頁）
#駕輛 #upcarhkg
#up熱話
#全港18區邊區最多及最少電動車充電位
________________________
Web: http://www.upcarhkg.com
YouTube: http://www.youtube.com/駕輛upcarhkg
Facebook: https://www.facebook.com/upcarhkg
IG: upcarhkg
