up一個掣

2020/09/11 16:10

近來頻頻落驟雨，跟住轉頭又出猛太陽，擋風玻璃好容易沾上一層污漬影響視野。唔想落車用濕布抹擋風玻璃嘅話，最方便嘅方法當然係撳一撳或拉一拉個擋風玻璃唧水掣。

論語有云：「功欲利其善，必先利其器」，所以要令擋風玻璃唧水器嘅清洗效果好，首個關鍵係水撥。假若水撥老化殘舊，或者沾滿沙塵污漬，想清洗得個擋風玻璃乾乾淨淨都難，所以大家每次洗車，最好順手用濕布抹一抹水撥膠條，兼且檢查一下膠條是否有損壞或老化。事實係，經常保持乾淨嘅水撥係耐用好多㗎！

另一個需要定期檢查嘅，係擋風玻璃清洗器嘅水壺存量，唔滿就添到滿，以備不時之需。若然添加專用清潔劑，清潔效果當然較好，用清水也無妨，但切勿使用家用玻璃清潔劑，因為這類家用清潔品有機會損害車蠟甚至車漆。如果使用濃縮清潔劑，混合清水期間記得寧願較稀而非較濃，因偏濃溶液有機會留下殘漬，就算無損車身也有礙觀瞻。

日子久了，擋風玻璃清洗器個唧嘴就有機會俾車蠟或污漬堵塞，噴射效果變差甚至噴唔出，這時候可以試試用小量無稀釋嘅車身清潔劑及牙刷清刷一下，未能改善問題嘅話，可以試用幼針通一通唧嘴噴孔，只不過小心不要令唧嘴噴孔移位。其實，唔想唧嘴淤塞最佳嘅方法，係打蠟期間避免唧嘴沾上車蠟，或者打蠟後用牙刷稍為刷一刷噴嘴噴孔。至於揭背車及SUV等之上嘅尾窗清洗器，保養方法與擋風玻璃清洗器一樣。

#駕輛　#upcarhkg

#Up一個掣

#擋風玻璃唧水掣

#噴一噴撥一撥乾淨晒

#定期檢查以備不時之需

___________________________

Facebook: www.facebook.com/upcarhkg

YouTube: www.youtube.com/駕輛upcarhkg

IG: upcarhkg