up一個掣

2020/09/18 13:00

早前與朋友聚會，其中一個老友話早前老婆在車內開唔到門落車，呱呱嘈，以為部車個後車門壞咗，所以去原廠維修中心整，點知只係唔知幾時有人鎖上個Child Safety Lock（兒童安全鎖），白走一趟兼且在維修中心俾個SA講句：「好多車主都遇到咁嘅情況，好平常，我哋舉手之勞，唔使收費嘅。」覺得好面懵！

其實我哋真係遇過唔少朋唔知部車有Child Safety Lock（通常位於車門鎖扣下方或內側），尤其係無家室嘅，因為Child Safety Lock顧名思義就係為小童而設嘅安全裝置，無需接載小童根本毋須使用，但若然接載小朋友嘅話，除咗務必要佢坐後座甚至用兒童安全坐椅，我哋建議大家一定要鎖上Child Safety Lock。

我哋《駕輛》同事Donny曾有一次親身經驗，佢多年前乘坐姐夫嘅MPV，該車仲係用舊款手動趟門，在高速公路行駛期間，坐在中排只得6、7歲嘅姨甥女不知為何突然拉動車門把手，趟門即時「逢」一聲打開，嚇得全車人大叫，幸好有配戴安全帶，而且坐在佢旁邊，Donny嘅家姐即時伸手抱住姨甥女，結果有驚無險。

事實上，Child Safety Lock嘅作用就係鎖上後防止兒童誤觸碰把手，意外地在行車途中打開車門，但係可以在車外打開。雖然鎖上Child Safety Lock後可能帶來小小不便，小童落車一定要大人先落車代為開門先得，但係安全至上嘛！為人父母怎會不願意做呢？

大家可能諗，萬一遇上交通意外，唔能夠在車內開門會否更加危險？其實只要鎖上靠近小童乘坐位置嘅一邊車門Child Safety Lock，另一邊不鎖上，兼且盡量有成年人陪伴小童坐在後座便無大問題，因為有緊急需要嘅話，都可以由成年乘客帶同小童由另一邊車門離開車輛。此外，若果鎖上後車門Child Safety Lock，就切記唔好鎖上電動車窗，因為就算車門唔能夠從車內打開，萬一有需要，後座成年乘客亦可打開車窗伸手出外，用車外門把手打開車門。總而言之，小朋友最安全嘅乘坐位置係後座，有小朋友在車上切記要鎖上Child Safety Lock啊！

#駕輛　#upcarhkg

#up一個掣

#ChildSafetyLock

#有小朋友就要鎖上兒童安全鎖

#唔鎖上嘅後果可以好嚴重

___________________________

Facebook: www.facebook.com/upcarhkg

YouTube: www.youtube.com/駕輛upcarhkg

IG: upcarhkg