汽車愈來愈電子化，好多新車嘅手掣（Hand Brake）都變咗一粒掣，唔驚因唔夠用力拉唔緊，車輛會意外溜前溜後。近年更因為用咗電子手掣，好多車仲設有Auto Hold功能，而且撳個掣就可以揀選用或唔用。

Auto Hold嘅功能，顧名思義就係自動Hold住部車，主要係停在燈位前，裝置會自動拉上電子手掣，大家唔使再踩迫力，就算部車停在斜路上都唔會溜前溜後。當需要再次開車，大家只要踩油，裝置就會自動解除手掣，自動波或棍波車都係咁運作。

其實有唔少駕駛者，包括我哋在內，起初都唔習慣用Auto Hold功能，首先係停車後唔使親手拉手掣就鬆開個迫力，感覺怪怪甚至有啲不安，下意識覺得部車會溜前或溜後。有啲相熟朋友甚至話，佢哋部車嘅Auto Hold功能一時得一時唔得，試過鬆開迫力後部車會溜前溜後，所以最係都放棄使用。

其實，有啲人覺得Auto Hold功能一時得一時唔得，係因為佢哋忘記或唔知必須步驟。首先係確保車輛完全停定，之後仲要再踩深一啲個迫力，確保觸發啟動Auto Hold裝置，然後先鬆開迫力。雖然有啲車款係毋須停車後再踩深啲個迫力，有啲車款係必須，但做咗一定無錯。

另外，有啲Auto Hold嘅自動鬆手掣反應的確偏慢，結果加油起步時有機會出現部車已經有動力向前行，但仍拖住少少迫力，結果起步動作有啲突兀，令部分追求完美嘅駕駛者不樂於使用。

不過，如果大家想停車後可以俾右腳稍後休息，唔使再踩住踏板，除咗自行拉動及解除手掣，啟動Auto Start功能不失為一個較方便嘅方法。

#駕輛　#upcarhkg

#up一個掣

#AutoHold

#停車自動拉手掣

#踩油自動解除

#右腳可以稍為休息都唔錯

#用唔用識隨尊便

___________________________

Facebook: www.facebook.com/upcarhkg

YouTube: www.youtube.com/駕輛upcarhkg

IG: upcarhkg