2023/09/08 20:00

經過整日黑雨嘅「洗禮」，相信全港都有好多位車主苦不堪言喇！幾乎所有Social Media都被無數嘅水浸車拋錨Post洗晒版，浸過轆、浸到車門已經算執到，唔好彩嗰班就只可以僅僅見到車頂甚至車都搵唔返。而喺呢段期間，好多親朋戚友及網友都問我哋《駕輛》，想知究竟一部車被水浸過，其實仲救唔救得返？

以汽油車嚟講，能夠令到引擎浸到死火嘅入水途徑不外乎兩個，一個係生風口（即係裝風隔嘅地方），另一個就係死氣喉。行緊車唔小心衝咗入大水氹，啲水通常就係由生風口走入去，仲撻得返著嘅話就算唔太嚴重，慢慢以怠速Run返引擎分分鐘可以當冇事發生過；但係大量入水嘅話，就有好大機會搞到「嘩佬腳」變形及噴注系統受損，要拆散引擎重裝先至救得返。

至於死氣喉入水嘅情況，通常都會較少喺行車途中發生，事關不斷有死氣向外排出，幾難入水，而且死氣鼓去到引擎其實仲有好大段距離，中間仲要經過催化器、死氣批，通常都要浸得好勁、浸咗好耐，仲要水深到盤頂高度，啲水先可以從呢個地方谷得入引擎裏面。萬一啲水真係咁樣入到去嘅話，咁真係喊定都得喇！因為呢個情況多數會引至活塞「乸死」，而中缸有水氣，亦會容易令氣缸壁生鏽，基本上「醫返都嘥藥費」！

不過，就算你救得返副機器，另一單大鑊嘢都未必走得甩！講嘅就係電路入水。冇錯，死車（部車當時冇郁）浸水拆出嚟曬返乾分分鐘可以當冇事發生，不過部車行緊時電路入水嘅話就冇咁好彩，因為水係導電嘅，就算入咗去Fuse箱都會即刻造成短路，而萬一走入行車電腦嘅話⋯⋯要換晒所有組件嘅費用，保證你下年農曆新年嗰陣，都仲係「初四」咁嘅樣！

而喺今次嘅事件入面，亦都有好多電動車遭殃，更有啲車主係啱啱出車幾個月就遇到呢個慘況，真係人間悲劇。其實，現今嘅電動車設計，防水能力一定有返咁上下，尤其是車底嗰份鋰電池，水深浸過車轆都通常未必有事嘅，但設計上就真係冇預你好似「發花膠」咁浸咁耐，萬一啲有大量水係咁浸住甚至沖住電池核心部份嘅話，錶板都會即時出現警告字眼，咁就真係神仙難救，打去代理問定換電要幾錢都得喇！

另外，好多人都會問，黑雨情況部車浸到咁，分分鐘要Total Loss，究竟Claim唔Claim到保險呢？如果只係買第三保嘅話，咁就當然要閣下自理啦！至於買咗全保，聽聞好難有得賠喎！其實又唔一定嘅，因為黑雨情況下受唔受保，保險公司通常會睇返車主有冇盡力去保護車輛免受損壞及意外，以及泊車嘅係唔係高危抑或安全嘅地點，咁當然最重要視乎隻隻字都好細嘅保單條款點寫啦！總之，搵人拖返部車去安全地方後，就嗱嗱聲打去保險公司問清楚喇！

#駕輛　#upcarhkg

________________________

Web: http://www.upcarhkg.com
YouTube: http://www.youtube.com/@upcarhkg

Facebook: https://www.facebook.com/upcarhkg
IG: upcarhkg