up一個掣

2020/08/07 15:08

以前一條車匙負責晒開門、鎖門、撻車及熄車，後來車匙扣上遙控器，只要撳一撳按鈕，「嘟嘟」兩聲咁就會開咗門鎖，「嘟」一聲就上鎖，方便咗唔少，尤其係突然唔太記得部車怕咗停車場邊個位置，或者替友人取車，遙控器便大派用場，除非遙控器無電。不過就算無電，只要搵到車輛，當年仍可以用車匙開門，跟住用車匙撻車，大不了或許需要打開車頭冚拔去防盜器嘅電源線、保險絲或蜂鳴器，然後便可照樣駕車離去，稍後有時間才更換遙控器電池也不成問題。

近十多年的新車車匙已經十居其九變為一件小精品，有啲依舊要按鈕為車門開鎖及上鎖，有啲依舊要插入車內所謂嘅鎖匙窿方可撻車，最新型嘅Smart Key就完全毋須駕車者攞出來，只要隨身攜帶（包括放在手袋或公事包內），走到車輛旁邊及用手抓住門柄，門鎖就會立即解除，上車後只要按掣便可撻車，熄車及落車後撳一撳門柄上小小嘅方形按鈕就可以鎖門，非常方便，但若果智能車匙無電就好麻煩。

數年前某個晚上，電話突然響起，原來朋友取車時不能開門，致電筆者求救，佢嘅座駕就係用智能車匙。佢話試過撳車匙上嘅按鈕，但毫無反應，估計車匙無電所致。我首先話俾佢知，大部分智能車匙都暗藏實體車匙，拔出來便可打開車門，可惜隔住電話聽指示，佢花咗十數分鐘先至完事。拔出實體車匙後遇上更棘手嘅問題，朋友話車門搵唔到鎖匙窿！

結果係點？我即時上網幫朋友搵資料，跟住隔住電話指示佢尋找門柄上嘅暗格膠蓋，然後撬開並露出鎖匙窿，多花近半小時終於可以開車門了！不過，朋友想撻車的時候，錶板亮起「Key Not Found」嘅警告燈，車匙無電係撻唔到車嘅！佢最終落車鎖上車門，改為搭的士回家，翌日替車匙換上新電池後才重返停車場取車。

朋友嘅遭遇可以話俾大家知，唔單止汽車電池突然無電會好麻煩，車匙突然無電亦都會，所以大家應學懂怎樣於車匙無電時打開車門，而且最好存放一粒車匙用嘅後備電池在車內，咁就應該唔會有類似上述嘅遭遇。

#駕輛　#upcarhkg

#車門粒掣用來鎖門

#車匙無電就乜都做唔到

#最好放粒後備電在車內

___________________________

Facebook: www.facebook.com/upcarhkg

YouTube: www.youtube.com/駕輛upcarhkg

IG: upcarhkg