up一個掣

2020/10/10 11:00

最近有朋友話想換部舊款棍波日產370Z揸，問佢點解，佢話因為係佢鍾意揸棍波車，部370Z亦夠快，而且有個自動轉波吻合系統，轉低波期間唔使做Heel and Toe都可以好順。我聽過之後笑而不語，因為我知佢嘅駕駛技術一般但性情急躁，揸住現時架上代棍波Mini Cooper經常Chok到嘔，連佢女朋友都叫佢不如唔好揸棍波車。

話時話，2009年到港嘅日產370Z已經有個叫SynchroRev Match，簡稱叫SRM嘅自動轉速吻合系統，撳撳波棍座右上方嘅S-Mode掣之後，電腦就會自動幫你於轉波期間吻合另一個波段嘅轉速，轉高或低波都適用，當年試揸過真係覺得自己立即變咗做神級Heel and Toe高手。不過諗深一層，揸棍波車要有電子裝置輔助吻合轉速，其實係唔係太屈機？失去玩棍波車嘅原意之餘，仲要無機會提升揸棍波車嘅技術呢？幸好，日產這個S-Mode係可以自選開關，鍾意用就用，唔鍾意用就熄咗去。

事隔多年後，今代本田Civic Type R FK8都設有自動轉速吻合系統，如果不問過程只求結果，這個系統於快揸期間真係令部車如虎添翼，真係幫到手，而且廠方知道這個系統唔係人人鍾意用，所以與日產370Z一樣可以自選開或關，只不過唔係撳個掣咁簡單，而係要喺中央屏幕內嘅清單中選項選擇開關。

另一邊廂嘅歐洲，2015年到港發售，獨沽一味只有棍波嘅保時捷Cayman GT4，都加裝咗自動轉速吻合系統，轉低波唔使做Heel and Toe都可以準確吻合轉速，唔會令部車Chok一Chok，只不過這個系統綑綁式連住Sport行車模式，即係用Sport一定有自動轉速吻合，用正常模式行車就想有自動轉速吻合都唔得。此外，據知今代Mini Cooper S及JCW等高性能型號，棍波版都有自動轉速吻合系統，但係熄咗這個系統嘅唯一方法，係要熄咗個Traction Control！可惜香港代理從未提供過手波版俾我哋及其他傳媒測試，所以未能肯定這個說法是否屬實。如果係嘅話，或多或少反映歐洲車工程師唔及日本車工程師細心，就連簡單加個開關掣俾駕駛者選擇用或唔用自動轉波吻合系統都無考慮過，或者考慮過但覺得唔加個掣都無所謂，咁樣原本賣點都隨時變為弱點啦！

#駕輛　#upcarhkg

#up一個掣

#自動轉速吻合系統

#有咗變HeelAndToe神級高手

#但係唔係人人鍾意

#有個掣揀開或關一定好過無得揀

___________________________

Facebook: www.facebook.com/upcarhkg

YouTube: www.youtube.com/駕輛upcarhkg

IG: upcarhkg