up一個掣

2020/08/14 12:31

在香港，雖然大家都叫該組燈為死火燈，但係除咗車輛真係死火抛錨唔行得，小巴、的士上落客期間會用，一般駕車者路邊、停車場等車位期間又會用，大模斯樣Double Park留部車在路中心會用，婚禮車隊亦會用，總之按掣著住死火燈通常都唔係因為部車死火。

其實外國駕駛者都會在非抛錨情況下閃動死火燈，譬如在日本，唔少駕駛者於cut線後都會滴答滴答閃動死火燈三兩次，這個做法等同香港駕駛者舉起單手（打開手掌而唔係豎直中指），向被cut線的後方車輛駕駛者道謝。據知歐洲駕駛者都有這個習慣，美國部分州份就有法例限制使用死火燈，非緊急情況下閃動隨時會被票控。其實就算部車真係行行吓突然引擎死火又或爆胎，但係著咗死火燈唔代表保證大家安全，所以謹記發生故障之後，盡量將車輛駛到路旁或路肩，尤其係在公速公路上，因為停在路中心非常危險，隨時累己累人啊！

曾在不同場合親耳聽過幾位駕車人士話，部車突然死火，點樣駛去路旁或路肩呀？突然爆胎和死火，筆者都親身經歷過，每次都可以安全駛離路中心至路旁，其中一次係大老山公路上突然死火，大概由小瀝源位置一直溜到石門迴旋處出口前先停車，超過半公里距離吧！突然遇上引擎死火其實沒大不了，只要車輛當時係行駛中，又唔係上斜或被其他車輛重重包圍塞車中，照理就可以利用慣性作用溜到路旁或路肩停車，著住死火燈提示其他人等救援。

遇上爆胎和引擎死火，最重要嘅當然係保持冷靜，首先必須捉緊軚盤確保車輛仍然受控，切忌第一時間煞車，因為係爆胎嘅話，一條車胎無氣，抓著力就會唔平均，煞車力度過大隨時就會出現搶軚甚至「典左典右」情況，反而更危險，除非不煞車就會撞向前方障礙物，否則最好不要立即煞車，要煞車都要輕輕腳，慢慢煞。

如果係引擎突然死火，軚盤自然會變重，重到好似扭唔到，實情用啲力，慢慢來，都可以扭軚，車輛仍然可以轉彎，所以講到尾，無論突然爆胎抑或引擎死火，大部分情況下都毋須停在路中心，只要收油減速，又或讓車輛靠住慣性溜動，十居其九都可以駛到路旁或路肩等相對較安全嘅位置才停車。

#駕輛　#upcarhkg

# up一個掣

#死火燈經常唔係死火時用

#真係死火或爆胎當然一定要用

#死火爆胎盡量唔好停在路中心