up news

2020/08/22 09:00

有唔少人對美國各種鑊形場賽事嗤之以鼻，不過兩屆F1總冠軍阿朗素 (Fernando Alonso)，就於2017年首次駕駛IndyCar賽車，挑戰美國著名嘅Indianapolis 500 (簡單Indy 500)大賽。雖然排位賽得第5都算唔錯，但最終只係第24名衝線。佢去年再接再厲，點知據佢自己及車隊稱因車輛調校出錯，排位賽時間差到入唔到圍，無得出賽。不過人生滿希望，今年阿朗素再次參加Indy 500，將會排在第26位起步比賽。

點解阿朗素攞咗兩屆F1冠軍都唔心足，仲要做新仔去美國挑機Indy 500？首先佢係想成為歷年來第二位賽車界「三冠王」(Triple Crown)。首個賽車界三冠王係已故車手希爾(Graham Hill)，佢個仔就係前F1總冠軍Damon Hill。至於何謂賽車界三冠王，其實係不成文榮譽，要贏到F1總冠軍、利曼24小時耐力賽全場第一名，以及Indy 500等三個榮衍，而阿朗素就只差個Indy 500就可以成為有史以來第二個三冠王！大家可能問，一場Indy 500冠軍個榮譽可以比得上F1全年總冠軍，以及利曼24小時大賽全場第一，好勁嘅咩？係呀！這個比賽已經過百年歷史，1911年已經有，二次大戰前曾經係世界錦標賽 (F1、格蘭披治前身)其中一站，今屆己經係第104屆。這場比賽著名之處包括比賽場地Indianapolis Speedway，賽道長2.5英哩 (約4.02km)，呈圓角長方形，看台大直路及另一邊相等直路長1km，另外兩條短直路長200m，四個90度彎角都係長400m及傾斜9.2度，因為整條賽道曾經係用紅磚鋪成而有Brickyard (磚場) 嘅別稱。這個賽車場固定觀眾席又係世界之最，約25.7萬個，加埋場中央營車泊位，過往多屆Indy 500都吸引到約40萬位現場觀眾，不過今年就因疫情閉門比賽。Indy 500大賽另一個特點係比賽距離及車速。顧名思義，比賽距離係500英哩，即係200圈、804.6km，可算係耐力賽，但係一個車手由頭賽到尾嘅耐力賽。車速方面，因為賽場設計，根本就係全程盡油比賽 (彎角轉低一個比率細丁多嘅5波)，鬥跟車攞氣流鬥賽車setting鬥膽色鬥意志鬥入Pit策略等等等等，有史以來最快圈速紀錄 (練習時間)係385km/h (大會一直用單圈平均時速做單位而唔用時間)，而比賽期間係不斷在350km/h以上，仲要不斷繞圈作賽，小編幻想吓都覺得係精神折磨！

咁辛苦都去比賽，除咗為咗榮譽之外，就係獎金。Indy 500一直以來都係全球數一數二高嘅賽事，1989年開始已經破百萬美元大關，2009年嘅一屆因多贊助，冠軍車手贏咗接近305萬美元，近十年就大概250萬左右，而且入到圍比賽，包尾都通常有10萬以上。今屆受疫情影響，賽事由慣常5月延期至今個星期日，而且閉門無觀眾入場，但大會早前公佈仍能夠集腋成裘，冠軍獎金會超過200萬美元。上星期排位賽做出最快圈速嘅車手，除咗排頭位出賽，亦都袋袋平安10萬美元獎金。

就係因為榮譽及獎金，過往都唔少F1車手都走去賽Indy 500，譬如畢奇 (Nelson Piquet)、文素 (Nigel Mansell)及佐藤琢磨等，而佐藤琢磨更贏出2012年一屆，現時仍然繼續在美國參加整季IndyCar錦標賽。而韋侖諾夫(Jacques Villeneuve) 及蒙度拿 (Juan Pablo Montoya)就係先戰IndyCar錦標賽，跟住轉戰F1嘅著名車手。講到尾，只係氹氹轉嘅賽車未必係差，無人睇嘅話一早已經摺埋啦！

#駕輛 #upcarhkg

#IndyCar #Indianapolis500

#阿朗素第三次挑戰

#希望成為三冠王

#今個星期日比賽

#獎金幾百萬美元

圖片來源：Arrow McLaren SP

___________________________

Facebook: www.facebook.com/upcarhkg

YouTube: www.youtube.com/駕輛upcarhkg

IG: upcarhkg