up news

2020/08/28 09:00

筆者認為汽車上其中一項最重要嘅設備，就係冷氣。點解？因為小時候返學放學出出入入坐嘅巴士都係「熱狗」，大熱天時坐巴士嘅滋味，尤其係遇上落雨個個閂埋個窗嘅時候，現在仍然記憶猶新。時至今日，巴士、小巴、的士、渡海小輪等公共交通工具都有冷氣，自己的一部車怎可能無，要在炎炎夏日焗身臭汗呢？

曾聽聞夏天駕駛開咗篷嘅開篷車毋須開冷氣，感覺仲好爽，筆者多年前借過朋友嘅MX-5試過了，覺得一啲都唔爽。其實，在公路上開到超過70km/h都算勉強可以，唔覺太熱兼唔會汗流浹背，但一旦車速低於70km/h，尤其係嘅高樓大廈林立嘅市區內，應該因車身、錶板及各種內飾都特別吸熱嘅關係，坐在開篷車內嘅感覺就好似坐在煎Pan上，塞車期間直情比跳出車外暴曬更難頂，而一同出遊嘅車主朋友就話覺得無問題，唔知係佢唔怕熱抑或我特別怕熱了。

無論原因係點，筆者一直以來於夏天撻車後，通常都會連隨將冷氣調至最涷及最大風速，維持十分八分鐘先至調低，而且長時間閂咗生風（即開動冷氣循環），因為閂咗生風後冷氣較為涼快。直至幾年前，睇過一篇有關汽車空氣質素嘅文章之後，先知道生風掣長開或長閂都未必系好事，要視乎情況。

筆者長期閂咗生風嘅原因，除咗因冷氣會較為涼快，仲有係覺得街上空氣污濁，閂晒窗開住冷氣閂埋生風嘅原因之一就係唔想吸廢氣，相信好多人都有此想法，如果車輛原裝設有冷氣風隔甚至離子空氣淨化系統，肯定更加深信不疑車內空氣一定乾淨過車外。不過，原來長期閂窗開冷氣閂生風，近乎密封嘅車廂內嘅氧氣含量就有機會降至偏低水平，尤其係長時間行車及滿載乘客。雖然缺氧情況唔會令人暈倒或死亡，但或多或少影響健康及行車安全。

車廂內唔夠氧氣嘅徵兆好容易被忽略，但其實好明顯嘅，就係駕駛者或乘客感到好似眼瞓咁唔夠精神，一個唔留神發生意外就唔好啦！如果只係開車不久，咁樣當然真係眼瞓疲勞所致，但如果係持續行車超過半小時之後發生，就可能係車廂氧氣含量下降引起。解決方法好簡單，包括開啟冷氣生風（即關掉冷氣循環），不過最快最直接係開小小窗，天窗也可，一分半分鐘就夠晒時間為車廂補充新鮮空氣。照咁計，不如長期開生風囉！係可以嘅，不過車外空氣真係比車內污濁，長時間開生風嘅話，冷氣系統就會吸入好多灰塵，換風隔變得較頻密，更唔好彩嘅話，隨時搞到冷氣凍Coil嚴重積塵變得唔夠凍，要搵車房洗冷氣先至回復正常。

補充一點，寶馬冷氣個循環掣有手動或自動模式兩個選擇，照理自動模式係因應車內及車外空氣質素而自動開關，但係不時駛入隧道後，車內嗅到一大陣廢氣味道都仲未閂上生風口，所以筆者覺得最實際方便都係自己動手揀開或閂。

#駕輛　#upcarhkg

# up一個掣

#冷氣生風掣

#長閂長開都唔好

#要開要閂最好由自己決定

___________________________

Facebook: www.facebook.com/upcarhkg

YouTube: www.youtube.com/駕輛upcarhkg

IG: upcarhkg