【英國百年老牌新紀元】MG竟然重返香港市場呀!
2021/03/19 17:00

上星期五介紹過今年應該有咩電動車到港,我哋有朋友睇過之後,即時打電話問功課咁,打電話俾我哋問MG係唔係真係會嚟香港賣?


我哋當然收到堅料先至講啦!同呢位朋友喺電話講吓講吓,原來佢唔係睇到我哋篇報導,都唔知道MG已經俾上海汽車集團收購咗,仲改咗個中文名叫「名爵」,既然係咁,就等我哋一次過簡介吓俾大家知MG自創立以嚟嘅衰盛。


MG最初係英國一間喺上世紀20年代成立,叫Morris Garages嘅汽車銷售維修店,賣嘅整嘅當然就係Morris(摩利士)啦!後嚟喺30年代再成立一間叫M.G. Car Co. Ltd.嘅公司,初期只係出售大改特改車身,跟住貼上自己MG徽章嘅Morris(摩利士)汽車,業務同其他Coach Builder(車身製造商)冇乜分別。


MG嘅生世都幾坎坷,先後俾Morris、British Motor Corporation(BMC)、British Leyland Motor Corporation(利蘭)、Rover(路華)等收購合併,而且1994年至2000年期間更因為寶馬收購咗Rover集團,MG亦都曾經係寶馬旗下嘅子公司。


要數香港人最熟識嘅MG型號,肯定係橫跨BMC、利蘭及路華年代嘅MG A、MG B及MG C,因為呢三款車都算係遮打道老爺車車展嘅常客,而後嚟用咗MR佈局嘅MG F亦都有唔少香港人捧場,MG F嘅一副K系列引擎更俾蓮花攞嚟用咗喺Mk1、Mk2 Elise及Exige之上,曾經好威威㗎!


可惜好景不常,MG業績後來走下坡,南京汽車於2005年收購咗MG,南京汽車後嚟又同上海汽車集團合併,MG依家就係上汽旗下嘅子公司,中文名叫名爵。而我哋上星期講過已經到港嘅MG EZS,就係MG有史以嚟第一部電動車。除咗喺中國發售之外,MG EZS亦都已經可以喺英國、法國、荷蘭、挪威等歐洲國家,以及新加坡及泰國買得到。


MG今次重返香港市場,一手策劃及穿針引線嘅就係香港汽車業界無人不曉嘅黃毅力先生。佢喺汽車行業打滾多年,創立嘅富利堡集團曾經叱吒香港水貨車市場,亦做過蓮花汽車代理,今次竟然成為MG嘅香港新代理,而且第一款引入嘅係廠方嘅首部電動車MG ZS EV,可見佢好有信心呢款車可以喺香港打出名堂。


竟究呢部MG ZS EV電動嘅表現係點?我哋都想知,所以會盡快安排試車,大家記得留意我哋嘅Facebook、IG及YouTube頻道喇!


#駕輛 #upcarhkg

#MG #百年老牌

#離離合合好多次

#現已係中國品牌

________________________

Web: http://www.upcarhkg.com

YouTube: http://www.youtube.com/駕輛upcarhkg

Facebook: https://www.facebook.com/upcarhkg

IG: upcarhkg