大家睇咗Gin姐同Brian仔試愛快Tonale未?廠方啱啱概括話2025年製嘅會有新嘅車廂設計,暫時有相睇嘅只係支波棍變咗「波餅」旋鈕,車廂有乜嘢其他改動就仲未知,只係知道1.5公升Turbo微混能版繼續都係160匹同埋配7速DCT。
大家試咗陳生同Brian試豐田Celica GT-Four WRC Edition未呀?原來捷克有位仁兄都好鍾意呢款車,於是將佢部車大改特改,結果就變成咁嘅樣,都幾㜺鬼喎!
繼6月發表Facelift版1系之後,寶馬啱啱再發表共用底盤及引擎嘅Facelift版2系Gran Coupe。話明共用底盤同引擎,Facelift版2系Gran Coupe嘅輸出當然一樣都縮咗水!
陳生認識豐田 Celica GT-Four ST205係因為當年好迷玩Sega Rally,而90後Brian仔就因為睇《頭文字D》。兩個完全不同年代嘅《駕輛》同事,今次有機會試揸全球限量2,500部嘅Celica GT-Four WRC Edition,自然有兩種完全不同嘅體會,之不過結論都係一樣,就係好~開~心~呀~!
MINI啱啱一口氣發表John Cooper Works Electric同埋John Cooper Works Aceman,大家記得唔好同之前嘅JCW Trim版本混淆,呢兩架真係有姿勢有實際,輸出大啲同快嘅純電動JCW版本!
MG Cyberster喺現時香港市場上唯一一款電動雙座開篷跑車,佢嘅獨特性毋庸致疑,我哋嘅同事Avery同Samantha都對佢好有興趣,所以今次由佢哋嚟試車,兼且從女性角度睇吓呢部電動雙座開篷跑車符唔符合到女車主嘅要求,係唔係又快又易揸又夠實用?殺入鬧市橫街窄巷同打開對鉸剪門有冇難度?
唔講可能大家唔知道,香港今年上半年嘅汽車銷售榜,BYD已經登上亞軍位置,而佢哋最新攻港嘅武器,就係呢部 #海獅7。呢個車系同之前嘅 #海豹 有好多共通之處,之不過尺碼更加大,事實佢暫時係香港市場上尺碼最大嘅中國品牌電動SUV,而且定價出奇地低,入門後驅版嘅一換一售價唔使27萬,我哋今次測試嘅雙摩打四驅版亦都唔到31萬,用抵食夾大件嚟形容一啲都唔誇張!至於設備、乘坐感、操控表現等等各方面係唔係將貨就價,抑或真係物有所值呢?大家睇片就會搵到答案!
其實唔少觀眾都知道Gin姐喺英國揸Ariya,所以今次就嚟個香港、英國兩地「平行時空」,一片睇晒陳生喺香港試車,英國就由Gin姐以真實用家角度,講吓揸咗部車咁耐有冇問題及實際耗電量,全面剖析日產Ariya係唔係值得擁有嘅日本電動車。
法拉利V12引擎靚聲就係人都知,但Purosangue套Burmester音響都好X靚聲,你又知唔知呢?今次陳生決定與眾同樂,召集咗一班《駕輛》觀眾同音響界前輩,齊齊品鑑一下呢套汽車音響有幾咁犀利,同場仲加映一套價值500幾萬嘅Burmester家居音響,嚟一場柏林之聲大匯演!究竟呢兩套音響各自有咩秘密?陳生點樣評價各自嘅音色?去片!
對愛車之人嚟講,一部車嘅車漆狀態好壞,往往都等同咗部車嘅質素高低,所以好多車主都唔介意使錢去保護愛車嗰層原裝油。時下相關嘅產品可謂琳瑯滿目,傳統派就多數愛勤力洗車同打蠟;冇時間打理就通常鍾意做鍍膜;近期好多人用嘅PPF貼膜亦非常流行;坦白講,各有所長,冇話邊隻Sure Win。而今次《駕輛》介紹嘅呢隻英國NGENCO,用途上都一樣係保護車漆嘅產品,不過唔係搽、唔係貼,而係直接噴上去,咁就可以做到既光亮又完美無縫嘅堅固漆面保護層,都咪話唔犀利。
近年市面多咗唔少DIY車身鍍膜,相信大家同我哋一樣都好想知道,呢啲幾百蚊貨仔嘅效能係唔係值回票價抑或廢到無倫,所以我哋《駕輛》自己攞錢出嚟買咗7款DIY車身鍍膜進行測試,結果連我哋都覺得出乎意料之外!
好多人都自認係一位好司機,我哋一班《駕輛》當然都唔例外,所以Gin話嚟一次心理測驗,睇吓邊位同事係佛系司機、邊位係躁底車手,結果最躁底嗰位竟然係⋯⋯大家都不妨同我哋一齊做呢個心理測驗,睇吓自己屬於乜嘢類型嘅駕駛者啦!
《駕輛》成立至今除咗拍攝試車影片之外,仲製作咗多條《駕輛齊齊Up》、《駕輛興趣班》等與汽車相關甚至無關嘅影片,《搵位搵食》更加得到好多觀眾歡迎,所以我哋會繼續加入新題材,《駕輛有人訪》今次就同大家初見面。
一直有睇《駕輛》嘅觀眾都知道,我哋不時會角色扮演去試車,又扮太太又扮保鑣又扮太小姐又扮司機,但自問點扮賽車手都唔似,所以今次決定搵真正嘅職業賽車手ShaunThong 唐偉楓同我哋一齊試車,而且邊試車邊同佢Chit Chat一吓揸車嘅心得,當然唔少得俾啲貼士大家點樣揸車會揸得更好啦!